НҮБ-ийн Ерөнхий Ассамблейн шийдвэрээр жил бүрийн 3 дугаар сарын 22-ны өдрийг “Дэлхийн усны өдөр” болгон тэмдэглэн өнгөрүүлэхээр тунхагласан. Энэ жил олон улсад "Дэлхийн усны өдөр" -ийг  "Мөсөн голыг хамгаалах нь" гэсэн уриан дор тэмдэглэн өнгөрүүлж байна. МБУС-ийн Газарзүйн тэнхим нь 22 дахь жилдээ усны өдрийг тэмдэглэн, Монголын Газарзүйн боловсролын нийгэмлэг, Нийслэлийн хот тохижилтын газар зэрэг албан байгууллага, аж ажуйн нэгжүүд, "Уудам Монгол" сургуулийн сурагчдын төлөөлөл болон тус сургуулийн газарзүйн багш Г. Оюун - Эрдэнэ нар хамтран шинийг санаачлан байгаль орчинд ээлтэй үйл ажиллагаа зохион байгууллаа.

"Мөсөн голын хамгаалах нь" гэсэн уриан дор тус тэнхимийн оюутнууд "Сэлбэ голын татмыг хамгаалахад оюутнуудын оролцоо", "Ундны усны эрүүл ахуй ба зохистой хэрэглээ", "Усны мөр" болон "Уудам Монгол" сургуулийн газарзүйн багш Г. Оюун - Эрдэнэ "Хичээлээс гадуурх үйл ажиллагааг дэмжих нь" сэдвээр өөрийн явуулдаг эко клубийн жишээн дээр тус бүр илтгэл хэлэлцүүлэв. 

Түүнчлэн ЕБС-ийн Газарзүйн хөтөлбөр, сурах бичгийн “Усан мандал” бүлэг сэдвийн хүрээнд “Ус ба уур амьсгалын өөрчлөлт (Мөсөн гол гэж юу вэ?), “Ус ба эрүүл мэнд (Мөсөн гол ба экосистем), “Усны бохирдол (Мөсөн голыг хамгаалах арга зам)”, “Усны эргэлт ба түүний ач холбогдол (Мөсөн гол хайлахад нөлөөлж буй шалтгаан)” сэдвүүдээр ЕБС-ийн хичээл, сургалтад ашиглах боломжтой сонирхолтой видео бичлэгүүдийг бэлтгэн танилцууллаа.

Энэхүү арга хэмжээ нь Тогтвортой хөгжлийн болон Уур амьсгалын өөрчлөлтийн боловсрол олгох зорилгоор их, дээд сургууль, судалгааны байгууллага, ЕБС-ийн багш, сурагчдын хамруулан ажиллаж байна. 

ГАЗАРЗҮЙН ТЭНХИМ 

ОЮУТНЫ "ГЕОТУР" КЛУБ